သြဂုတ်လ(၉)ရက်၊ ၂၀၁၀ခုနှစ်

ကရင်နီဖွံ့ဖြိုးရေးသုတေသနအဖွဲ့၏ ထုတ်ပြန်ကြေငြာချက်
နအဖနှင့် တရုတ်ရင်းနှီးမြှုပ်နှံသုတို့၏ သံလွင်မြစ်တွင်တည်ဆောက်မည့် ရေကာတာသစ်အစီအစဉ်များအပေါ် ကရင်နီလူထုမှဆန့်ကျင်ကွက်ခြင်း

၂၀၁၀-ခုနှစ်သြဂုတ်လ(၉)ရက်နေ့၌ ကျရောက်သော (၆၂)ကြိမ်မြောက် ကရင်နီအမျိုးသားခုခံတော်လှန်ရေးနေ့ အခါသမယမှာ မြန်မာစစ်အုပ်စုနှင့် တရုတ်ရင်းနှီးမြှုပ်နှံသူတို့၏ ကရင်နီပြည်နယ်အတွင်း သံလွင်မြစ်ပေါ်တွင် ရေအားလျှပ်စစ်ထုတ်လုပ်ရေးအတွက် ဧရာမရေကာတာသစ် တစ်ခုတည်ဆောက်ရန် စီစဉ်လုပ်ဆောင်နေမှုအပေါ် ကရင်နီဖွံ့ဖြိုးရေးသုတေသနအဖွဲ့အနေဖြင့် ပြင်းပြင်းထန်ထန် ရှုတ်ချကန့်ကွက်ပါသည်။

နအဖစစ်အုပ်စုနှင့် ယူနန်ပြည်နယ်၊ဒါထာရေအားလျှပ်စစ်ထုတ်လုပ်ရေးကုမ္မဏီDatang(Yunnan)United Hydropower Developing Co) တို့သည် ၂၀၁၀-ခုနှစ် ဇန္န၀ါရီလ(၇)ရက်တွင် ရွာသစ်ကျေးရွာအနီးလျှပ်စစ်ဓါတ်အား မီဂါဝပ်(၆၀၀)ထုတ်ပေးနိုင်မည့် ရေကာတာတစ်ခု ဆောက်လုပ်ရန် လိုအပ်သောတိုင်းတာမှုကို (၂)ကြိမ်ပြုလုပ်ခဲ့ပြီးဖြစ်သည်။ ၄င်းအပြင် မြန်မာပြည်အလယ်ပိုင်းမှ အလုပ်သမားများခေါ်ယူလျက်ရှိပြီး ရေကာတာတည်ဆောက်မည့်နေရာသို့ ဆောက်လုပ်ရေးပစ္စည်းများ စတင်ပို့ဆောင်နေပြီးဖြစ်ပါသည်။
စစ်အုပ်စု၏ မြေလှန်စစ်ဆင်ရေးများကြောင့် ထိုင်းနိုင်ငံအတွင်းခိုလှုံနေသော သောင်းနှင့်ချီသည့် ကရင်နီဒုက္ခသည်တို့၏ မူလနေထိုင်လာခဲ့ကြသည့် ဒေသများ၊ သံလွင်မြစ်တလျှောက်ရှိ မြေနေရာအမြောက်အများကို နစ်မြှုပ်စေနိုင်မည့် ဤဧရာမစီမံကိန်းနှင့်ပါတ်သက်၍ ပွင့်လင်းမြင်သာမှု မရှိသကဲ့သို့ ကရင်နီလူထုများနှင့်လည်း တိုင်ပင်ညှိနှိုင်းမှုမရှိခဲ့ပါ။
နအဖနှင့်ဒါထာကုမ္မဏီတို့၏ချုပ်ဆိုထားသည့် ထိုနားလည်မှုစာချွန်လွှာတွင် ကရင်နီပြည်အတွင်း သဘက်ချောင်းတွင် လျှပ်စစ်ဓါတ်အား(၁၁၀)မီဂါဝပ်နှင့်ပွန်ချောင်းတွင် လျှပ်စစ်ဓါတ်အား(၁၃၀)မီဂါဝပ် အသီးသီးထုတ်လုပ်ပေးနိုင်မည့် ရေကာတာများကိုလည်း တည်ဆောက်သွားရန် ပါရှိသည်။
ကရင်နီလူထုတို့သည် လွန်ခဲ့သည့်နှစ်ပေါင်း(၅၀)ကတည်းက ကရင်နီပြည်နယ်၊ လောပီတတွင် မြန်မာနိုင်ငံ၏ပထမ အကြီးမားဆုံးရေအားလျှပ်စစ်ထုတ်လုပ်ရေးစီမံကိန်းတည်ဆောက်ခဲ့ပြီး ဒေသခံ(၁၂၀၀)ကျော်တို့သည် အခြားဒေသသို့ အဓမ္မပြောင်းရွေ့ခဲ့ကြရသည်။ ၉၅-ရာခိုင်နှုန်းသော လျှပ်စစ်ဓါတ်အားကို အခြားမြန်မာပြည်ဒေသအသီးသီးသို့ ပို့ဆောင်ပေးခဲ့ပြီး စက်ရုံလုံခြုံရေးအတွက် မြေမြှုပ်မိုင်းအလုံးပေါင်း(၁၈၀၀၀)မြှုပ်နှံထားခြင်းကြောင့် မြေမြှုပ်မိုင်းများသည် ကရင်နီလူထုအပေါ် လူသတ်သမားအဖြစ် တည်ရှိနေဆဲဖြစ်သည်။
ယခုနောက်ထပ်တည်ဆောက်မည့် ရေကာတာသစ်များသည် ဆယ်စုနှစ်များအတွင်း မြန်မာစစ်တပ်၏ စနစ်တကျ လူ့အခွင့်အရေးချိုးဖေါက်မှုများဖြစ်သည့် အစုလိုက်အပြုံလိုက် အဓမ္မပြောင်းရွှေ့မှု၊ ကျေးရွာများမီးရှို့ဖျက်ဆီးမှု၊ သတ်ဖြတ်မှု၊ ညှင်းပန်းနှိပ်စက်မှုနှင့် အမျိုးသမီးများအား မုဒိမ်းကျင့်မှုစသည်များကို ကြုံတွေ့ခံစားနေကြရသည့် ကရင်နီလူထုတို့၏အခွင့်အရေးများကို ဆက်လက် ချိုးဖောက်ခံရမည်ဖြစ်သည်။ အခြေခံအခွင်းအရေးဆုံးရှုံးမှုကြောင့် ကရင်နီလူထုတို့သည်(၆၂)နှစ်ကြာရှည်ပြီဖြစ်သည့် အမျိုးသားခုခံတော်လှန်ရေးလှုပ်ရှားမှုကို သြဂုတ်လ(၉)ရက်၊ ၁၉၄၈ ခုနှစ်တွင် စတင်ဆင်နွှဲ့လာခဲ့ကြသည်။
ထိုကြောင့် ကရင်နီဖွံ့ဖြိုးရေးသူတေသနအဖွဲ့မှ ကရင်နီပြည်နယ်တွင်တည်ဆောက်မည့် ဤရေကာတာသစ် အစီအစဉ်များကို ပြင်းပြင်းထန်ထန် ရှုတ်ချကန့်ကွက်ပြီး နအဖနှင့် ဒါထာကုမ္မဏီတို့၏ အစီအစဉ်များကို ချက်ချင်းရပ်တန့်ရန် တောင်းဆိုသည်။
လောပိတရေအားလျှပ်စစ်ထုတ်လုပ်ရေးစီမံကိန်း၏ထိခိုက်နစ်နာမှုအသေးစိတ်ကိုပိုမိုသိရှိရှာဖွေလိုပါက ၂၀၀၆-ခုနှစ်တွင် ထုတ်ပြန်ထားသည့် “စစ်ဗိုလ်ချုပ်များ၏ရေကာတာ”အစီရင်ခံစာကို www.burmariversnetwork.org ၀ိုက်ဆိုက်တွင် တက်ရောက်ဖတ်ရှုနိုင်ပါသည်။

ဆက်သွယ်ရန်-
ခူးတော်ရယ်
ဖုန်း- ၀၈ ၉၈၃၅ ၆၁၂၈

အစီရင်ခံရယူရန်-မြန်မာဘာသာ